نیوز آئٹم
تاریخ: 02 مارچ 2021ء
سندھ ہائی کورٹ نے سی پی این ای کے اراکین کے اخبارات کے 2018ء تک کے 1.79 ملین روپے کے بقیہ بجٹیڈ واجبات کی ادائیگیوں کا حکم دیدیا
کراچی ( ) سندھ ہائی کورٹ نے محکمہ اطلاعات سندھ کو کونسل آف پاکستان نیوزپیپر ایڈیٹرز (سی پی این ای) کے اراکین کے اخبارات کے 2018ء تک کے 1.79 ملین روپے فوری طور پر ادا کرنے کا حکم دیا ہے۔ یہ حکم سندھ ہائی کورٹ کے جسٹس محمد علی مظہر اور جسٹس امجد علی سہتو پر مشتمل ڈویژن بنچ نے کونسل آف پاکستان نیوزپیپر ایڈیٹرز (سی پی این ای) کی جانب سے اخبارات کو سرکاری اشتہارات کی دسمبر 2018ء تک کے تمام واجبات کی سندھ ہائی کورٹ کے واضح احکامات کے باوجود واجبات کی عدم ادائیگیوں سے متعلق حکومت سندھ کے خلاف دائر کی گئی توہین عدالت کی درخواست کی سماعت کرتے ہوئے دیا۔ اس موقع پر ڈائریکٹر انفارمیشن عزیز احمد ھکڑو نے عدالت میں پیش ہو کر بتایا کہ سی پی این ای کے اراکین کے پانچ اخبارات کے بقیہ بجٹیڈ واجبات کی جانچ پڑتال ہو چکی ہے جس کی مجموعی رقم تقریباً 1.79 ملین روپے ہے جبکہ باقی دو اخبارات کی جانچ پڑتال جاری ہے جو ایک ہفتے میں مکمل کر لی جائے گی۔ عدالت نے محکمہ اطلاعات سندھ کو 1.79 ملین روپے کی فوری ادائیگیوں کے احکامات جاری کرتے ہوئے آئندہ سماعت پر جانچ پڑتال کا عمل مکمل کر کے تفصیلی رپورٹ جمع کرانے کا حکم دیا اور سماعت 15 مارچ 2021ء تک ملتوی کردی۔ سی پی این ای کی جانب سے غلام محمد درس ایڈووکیٹ نے پیروی کی۔
جاری کردہ: کونسل آف پاکستان نیوزپیپر ایڈیٹرز۔
