حکومت سٹیک ہولڈرز کی مرضی کے بغیر میڈیا اتھارٹی تشکیل نہیں دے گی

0
98

پریس ریلیز
تاریخ: 05جون 2021ء

حکومت سٹیک ہولڈرز کی مرضی کے بغیر میڈیا اتھارٹی تشکیل نہیں دے گی

وفاقی وزیراطلاعات فواد چوہدری کی سی پی این ای کے عہدیداران کو یقین دہانی

لاہور (پ ر) وفاقی وزیراطلاعات فواد چوہدری نے دو ٹوک الفاظ میں واضح کیا ہے کہ پی ٹی آئی کی حکومت میڈیا کی آزادی پر پورا یقین رکھتی ہے۔ پرنٹ، الیکڑانک اور سوشل میڈیا کو ریگولیٹ کرنے کے لیے حکومت تمام اسٹیک ہولڈرز کے مشورے کے ساتھ قوانین لائے گی۔ میڈیا تنظیموں کو کانسپٹ پیپر پر بھجوا دیا گیا اس پر سی پی این ای سمیت تمام صحافتی تنظیموں سے بامقصد تبادلہ خیال کیا جائے گا۔ ایوان اقبال میں وفاقی وزیر اطلاعات فواد چوہدری نے کونسل آف پاکستان نیوز پیپر ایڈیٹر (سی پی این ای) کے عہدیداران سے ملاقات کے دوران کہا کہ سوشل میڈیا پر جاری آرڈننس فیک نیوز کے زمرے میں آتا ہے جس سے حکومت کا کوئی تعلق نہیں ہے۔ چاہتے ہیں کہ نئی ٹیکنالوجی خاص طور پر سوشل میڈیا ، یوٹیوب پر فیک نیوز کے سلسلے کو روکنے کے لیے قانون سازی ضروری ہے۔ خواہ نیا قانون لایا جائے یا پرانے قوانین میں ترمیم ہو۔ اگر اسٹیک ہولڈرز نے کانسپٹ پیپر پر اعتراض کیا تو ہم ایسا کوئی کام نہیں کریں گے جس سے میڈیا پر پابندی کا تاثر ابھرے۔

فواد چوہدری نے کہا کہ سی پی این ای کی تجویز کے مطابق تمام محکموں کے بلوں کی ادائیگی محکمہ اطلاعات کے ذریعے اختیار کی جا سکتی ہے۔ اس سلسلے میں انہوں نے پی آئی او کو لائحہ عمل تیار کرنے کی ہدایت کی۔ سی پی این ای کے صدر عارف نظامی نے وفاقی وزیر اطلاعات کو خوش آمدید کہتے ہوئے کہا کہ ان دنوں صحافتی اور سیاسی حلقوں میں پاکستان میڈیا ڈیویلپمنٹ اتھارٹی کے حوالے سے تشویش پائی جاتی ہے۔ ہم چاہتے ہیں کہ حکومت آزادی صحافت کے منافی کوئی اقدام نہ کرے تاکہ پریس اور حکومت کے مابین خوشگوار تعلقات برقرار رہیں۔ وفاقی وزیر نے سوشل میڈیا پر گردش کرنے والے آرڈی نینس کو فیک قرار دیتے ہوئے کہا کہ اس سے ریگولیٹری اتھارٹی کی ضرورت بڑھ گئی ہے۔ حکومت کا مقصد آزادی کو محدود کرنا نہیں بلکہ میڈیا کے حوالے سے موجود اداروں پریس کونسل ، پیمرا ،آڈٹ بیورو آف سرکولیشن، رجسٹرار آفس میں ہم آہنگی پیدا کرنا اور کارکنوں کے حقوق کے تحفظ کو یقینی بنانا ہے۔ سی پی این ای کے صدر عارف نظامی کی سربراہی میں ہونے والی ملاقات میں سینئر نائب صدر علی کاظم وحید، ڈپٹی سیکریٹری جنرل عامر محمود، سابق سیکریٹری جنرل اعجازالحق، نائب صدر ارشاد احمد عارف، چیئرمین پنجاب کمیٹی محمد حیدر امین، فنانس سیکریٹری حامد حسین عابدی، انفارمیشن سیکریٹری عبدالرحمان منگریو، جوائنٹ سیکریٹری غلام نبی چانڈیو، سینئر اراکین ایاز خان ، یوسف نظامی، پرنسپل انفارمیشن آفیسر (پی آئی ڈی) سہیل علی خان اور پی آئی ڈی لاہور کے ڈی جی شفقت عباس نے شرکت کی۔

جاری کردہ: کونسل آف پاکستان نیوزپیپر ایڈیٹرز۔

LEAVE A REPLY

Please enter your comment!
Please enter your name here